२०७९ श्रावण २४ मंगलवार

मन्त्री आले भन्नुहुन्छ : इमान बेचेर कुर्सीमा बस्दिनँ ।

काठमाण्डाै – संस्कृति, पर्यटन तथा नागरिक उड्डयनमन्त्री प्रेमबहादुर आलेले आफ्नो इमान बेचेर मन्त्रीको कुर्सीमा नबस्ने बताउनुभएको छ ।

आज शुक्रवार नेपाल पर्यटन बोर्डको २३ औँ वार्षिकोत्सवमा बोल्दै मन्त्री आलेले इमान बेचेर कुर्सीमा नबस्ने बताउनुभएको हो । उहाँले अहिले छानबिनका क्रममा रहनुभएका बोर्डका प्रमुख कार्यकारी अधिकृत (सीईओ) धनञ्जय रेग्मीले

टोयोटाका गाडी बेचेर आफ्नो इमान किन्न खोजेको भन्दै आक्रोश व्यक्त गर्नुभयो । मन्त्री आलेले सीईओ रेग्मीकै कारण बेलायतमा भएको विश्व पर्यटन मेलामा नेपालको बेइज्जत भएको भन्दै रक्सीको मातमा उन्मत्त भएका मानिसलाई संस्थाको सीईओ बनाउँदा संस्था चल्न नसक्ने बताउनुभयो ।

उहाँले सीईओ रेग्मीलाई आफ्नो इमान किन्ने कुरा सपनामा पनि नसोच्न चेतावनी दिनुभयो । मन्त्री आलेले भन्नुभयो, ‘अब यहाँ जाे काेहीलाई ल्याएर राजनीतिक नियुक्ति दिइन्छ । अब त्यो मान्छे मनमाैजी हुँदा जे पनि गर्छ ।

म जान्नँ भन्दा पनि जबरजस्ती बेलायत लगे । त्यहाँ गएपछि मैले मेरो देशका लागि कोभिडबाट थला परेको देश, हस्पिटालिटीमा लागेका साथीहरूसहित फोरममा बोल्ने इच्छा थियो । तर सीईओ रेग्मीले केही पनि छैन बोल्ने कार्यक्रम मन्त्रीज्यू भने । त्यस्ता मान्छेलाई सीईओ बनायौँ भने संस्था चल्छ ?

सदस्यहरूले यस्तो गर्नुहुँदैन संस्था डुब्छ भन्दा ल तपाईँ आज धेरै रिसाउनुभयो, जाउँ हिँड्नुस् रक्सी खान भन्ने, त्यस्ता सीईओ बनाएपछि संस्था चल्छ ? म त दुःखका साथ भन्छु, लन्डनमा हुँदा कार्यक्रममा डेढ घण्टा म उभिएँ, सबैले स्याम्पेन खाइरहेका छन् । म नखाने मान्छे साइडमा उभिरहेँ । सीईओले मलाई पनि खा भन्छ ।

उसले पहिलाको मन्त्री जस्तो ठान्यो होला प्रेम आलेलाई । चार वटा गाडी बेचेर प्रेम आलेलाई त्यो इमान म किन्छु भनेर सोच्यो होला, त्यो सपनामा पनि नसोचे हुन्छ । इमान बेचेर म यो चियरमा बस्नेवाला छैन ।’

मन्त्री आलेले आफ्नो मन्त्रालय अन्तर्गतका सङ्घ–संस्थामा विकृतिकाे चाङ भएकाले सम्हाल्नै गाह्रो भइरहेको बताउनुभयो । उहाँले पहिला ‘काले काले मिलेर भाले खाए’ पनि अब प्रेम आले आएकाले भ्रष्टाचार हुन नदिने बतउनुभयो । -उज्यालो अन्लाईन बाट

२०७८ पुष १७, शनिबार २१:३१ गते 1 Minute 494 Views

यहाँ प्रकाशित कुनै समाचारमा तपाईंको गुनासो भए हामीलाई [email protected] com मा इमेल गर्न सक्नुहुनेछ । यही इमेलमा तपाईंले आफ्नो विचार वा विश्लेषण, सल्लाह र सुझाव पनि पठाउन सक्नुहुनेछ । हामीसँग तपाईं फेसबुकट्विटरमा पनि जोडिन सक्नुहुन्छ ।