२०७९ श्रावण २४ मंगलवार

त्रिपाल ओढाएर राखिएकाे झन्डै १५ महिनापछि रेल सञ्चालनकाे तयारी

काठमाण्डाै : सरकारले जनकपुर–जयनगर रुटमा चलाउन भारतसँग खरिद गरेको नेपाली ध्वजावाहक रेल त्रिपाल ओढाएर राखिएको झन्डै १५ महिनामा बल्ल सञ्चालनमा ल्याउने तयारी गरेकाे छ ।

भौतिक पूर्वाधार तथा यातायात मन्त्रालयले भारतको जयनगरदेखि धनुषाको कुर्थासम्मको ३४ किलोमिटर रेल सेवा सञ्चालनको अन्तिम तयारी भएको बताएको हो । मन्त्रालयले प्रधानमन्त्री शेरबहादुर देउवाको भारत भ्रमणको क्रममा रेल सेवा उद्घाटनको मिति तय हुने जनाएको छ ।

सरकारले गएकाे वर्ष ८४ करोड ६५ लाख रुपैयाँमा खरिद गरेको दुई वटा रेल गएकाे वर्षको असोजदेखि धनुषाको इनर्वा स्टेशनमा त्रिपालले ढाकेर राखिएको छ । लामो समयसम्म ट्र्याकमा त्रिपाल ओढाएर राखिएको भन्दै तीव्र आलोचना भइरहे पनि सरकार भने रेल खरिद गरेको झन्डै १५ महिनामा बल्ल सञ्चालनको अन्तिम तयारीमा जुटेको हो ।

भौतिक पूर्वाधार तथा यातायात मन्त्री रेनुकुमारी यादवले तत्काल रेल सञ्चालनमा ल्याउने गरी सम्पूर्ण तयारी भइसकेको बताउँदै प्रधानमन्त्री देउवाको भारत भ्रमण क्रममा दुई देशका प्रधानमन्त्रीबीचको छलफलपछि उद्घाटनको मिति तय हुने जानकारी दिनुभयो ।

प्रधानमन्त्री देउवाले यही पुस २५ देखि २७ सम्म भारत भ्रमण गर्ने तयारी भएको छ । यद्यपि प्रधानमन्त्री देउवाको भारत भ्रमणको मिति र कार्यक्रम भने सार्वजनिक भइसकेको छैन । यता भौतिक पूर्वाधार तथा यातायात मन्त्रालयका सचिव ई. रवीन्द्रनाथ श्रेष्ठले पनि जनकपुर–जयनगर रुटमा रेल

सञ्चालनको सबै तयारी पूरा भएको जानकारी दिँदै भारत सरकारको तर्फबाट उद्घाटनको मितिको प्रतिक्षामा रहेको बताउनुभयो । उहाँले रेल सञ्चालनका लागि अहिले दैनिक रूपमा ट्र्याक परीक्षण भइरहेको पनि बताउनुभयो ।

यस्तै भौतिक पूर्वाधार तथा यातायात मन्त्रालयका सचिव श्रेष्ठले केही नदीमा आन्तरिक जल मार्ग विकासका लागि काम भएरहेको पनि जानकारी दिनुभएको छ । उहाँले चालु आर्थिक वर्षभित्रै कर्णाली, कालीगण्डकी, कोसी, नारायणी र त्रिशूली नदीमा जल मार्ग सञ्चालनका लागि सम्भाव्यता अध्ययन गरी

यात्रा गर्नका लागि प्रयास गरिरहेकाे बताउनुभयो । उहाँले जल यातायात नियमन गर्न ऐन, कानुन अगाडि बढाएको पनि बताउनुभयो । सचिव श्रेष्ठले नेपाल अन्तर्राष्ट्रिय समुद्री सङ्गठनको सदस्य राष्ट्र भएको बताउँदै त्यसका सन्धिहरूको अध्ययन गर्न मन्त्रालयले समिति गठन गरेको पनि जानकारी दिनुभयो । -उज्यालो अन्लाईन बाट

२०७८ पुष २२, बिहीबार २१:३६ गते 1 Minute 156 Views

यहाँ प्रकाशित कुनै समाचारमा तपाईंको गुनासो भए हामीलाई [email protected] com मा इमेल गर्न सक्नुहुनेछ । यही इमेलमा तपाईंले आफ्नो विचार वा विश्लेषण, सल्लाह र सुझाव पनि पठाउन सक्नुहुनेछ । हामीसँग तपाईं फेसबुकट्विटरमा पनि जोडिन सक्नुहुन्छ ।